ഭാവി "ഫാര്യ" .....................

എന്‍റെ ജീവിതം ഇങ്ങനെ ഒഴുകി പോവുകയാണ് . മീനച്ചിലാറ് പോലെ. ശാന്തം സുന്ദരം . എങ്കിലും ഞാന്‍ സന്തോഷവാനല്ല . വെറുതെ ഇങ്ങനെ അങ്ങ് ജീവിച്ചു പോകുന്നു . ഇവിടെ മഞ്ഞു കാലം തുടങ്ങാന്‍ പോവുകയാണ് . ഇനി വെളിച്ചവും കുറയും . അതോടെ പിന്നെ മനുഷ്യരെല്ലാം " ഡിപ്രഷന്‍" അടിക്കാന്‍ തുടങ്ങും . സായിപ്പും മദാമ്മമാരും ഈ കാലാവസ്ഥ വരുമ്പോഴേ നാട് വിടും . അവര്‍ ഡിസംബറില്‍ " ഇയര്‍ എന്‍ഡ് " ആഘോഷം എന്ന് പറഞ്ഞു ഏഷ്യന്‍ രാജ്യങ്ങളിലേക്ക് പോകും . ജീവിക്കാന്‍ വേണ്ടി വന്നു കിടക്കുന്ന നമുക്ക് അങ്ങനെ പോകാന്‍ പറ്റു കേലല്ലോ . ഒറ്റക്കുള്ള ജീവിതം ഭയങ്കര മടുപ്പാണ് . സത്യം . ഈ തണുപ്പില്‍ , കൂട്ടിനൊരാളില്ലാതെയുള്ള ജീവിതം എന്നെ വല്ലാതെയാക്കുന്നു. ബൈബിളില്‍ ആദം ദൈവത്തോട് പ്രാര്‍ ഥിച്ചത് പോലെ , ഒരു കൂട്ട് എനിക്കും തരണേ എന്ന് പ്രാര്‍ഥിച്ചാലോ എന്ന് ഞാന്‍ ഇടയ്ക്കിടയ്ക്ക് ആലോചിക്കാറുണ്ട് . കൂട്ടായ് ഹവ്വ മാഡത്തിനെ കിട്ടിയതോടെ ആദം അപ്പൂപ്പന്‍റെ ജീവിതം കട്ടപൊക യായത്‌ ഓര്‍ക്കുമ്പോള്‍ , ഒരു പെണ്ണിനെ തരണേ ദൈവമേ എന്നുള്ള പ്രാര്‍ത്ഥന വേണ്ടാന്ന് വെച്ചു. എങ്കിലും ഇവിടുത്തെ മലയാളം കുര്‍ബാനയുള്ള പള്ളികളിലും മലയാളി പ്രാത്ഥന സമ്മേളനത്തിനുമൊക്കെ പോകാറുണ്ട് . നേഴ്സ് മാരെ കാണാനൊന്നും അല്ല കേട്ടോ . വെറുതെ പോകുന്നുവെന്നേ ഉള്ളു . മമ്മി പറഞ്ഞിട്ടുണ്ട് പ്രാര്‍ഥനയില്‍ ഉറച്ചു വിശ്വസിക്കണമെന്ന് . വെറുതെ സമയം കളയുന്നതല്ലാതെ ഒരു മെച്ചവുമില്ല. തുലാമാസത്തിലെ വരാലും പാര്‍പ്പും വരുന്ന പോലെയാണ് ഇവിടുത്തെ നേഴ്സ് മാരും വരുന്നത് 
.കൂടെ കുഞ്ഞുങ്ങളും കെട്ടിയവന്മാരുമായി ഒരു പട തന്നെയുണ്ട്‌ .
പുതിയ പിള്ളേരൊന്നും വരുന്നില്ല എന്ന് തോന്നുന്നു .
പുതിയ വര്‍ക്ക്‌ പെര്‍മിറ്റൊന്നും ബ്രിട്ടന്‍ നേഴ്സ് മാര്‍ക്ക് കൊടുക്കുന്നില്ല . ഹും , എന്നെ പോലെയുള്ള യുവ മിഥ്‌നങ്ങളുടെ കട്ടേം പടോം മടക്കാനായിട്ടു ബ്രിട്ടന്റെ ഓരോ നിയമോം . 
എന്തായാലും വെറുതെ ഇരിക്കുമ്പോള്‍ ഓരോ സ്വപ്‌നങ്ങള്‍ കാണാറുണ്ട് ഭാവി ഭാര്യയെ പറ്റി.  
വേണ്ട . സ്വപ്‌നങ്ങള്‍ ഒന്നും ഞാന്‍ എഴുതുന്നില്ല . എഴുതിയാല്‍ പിന്നെ ബൂലോകത്തുള്ളവന്‍ മാരെല്ലാം കൂടി ഓട്ടോ പിടിച്ചു ഇംഗ്ലണ്ടില്‍ വന്നു എന്നേ തല്ലും . അല്ലെങ്കില്‍ തന്നെ ഇന്ന് എനിക്കങ്ങനെ പ്രത്യേകിച്ച് സങ്കല്‍പ്പങ്ങള്‍ ഒന്നും ഇല്ല .എങ്കിലും ഒരു "മെയില്‍ ഷോവനിസ്റ്റ്‌ " ആയ ഞാന്‍ പലതും ഭാവി ഭാര്യയില്‍ നിന്ന് പ്രതീക്ഷിക്കാറുണ്ട് . 
ഭാവി ഭാര്യ , എനിക്ക് മട്ടണ്‍ ബിരിയാണി വെച്ചു തന്നില്ലെങ്കിലും കഞ്ഞിയും പാവയ്ക്ക തോരനും ഉണ്ടാക്കി തരണം . ജോലി കഴിഞ്ഞു ഞാന്‍ വരുമ്പോഴ് എന്‍റെ അടുത്ത്‌ വന്നിരുന്നു എന്നോട് വര്‍ത്തമാനം പറയണം . സ്നേഹത്തോടെ കഞ്ഞിയും പാവയ്ക്ക തോരനും എനിക്ക് വിളമ്പി തരണം . എല്ലാ വെള്ളിയാഴ്ച രാത്രികളിലും എനിക്ക് ഏറ്റവും ഇഷ്ടപെട്ട അമേരിക്കന്‍ ജെന്നസി വിസ്കി ജാക്ക് ഡാനിയല്‍സ് ഞാന്‍ കുടിക്കും .( ഇന്നല്ല , കല്യാണം കഴിഞ്ഞു ശരിക്കും ഒരു കോട്ടയം അച്ചായന്‍ ആയി കഴിഞ്ഞിട്ട് . ഇപ്പോള്‍ ഞാന്‍ കുടിക്കാറില്ല സത്യം . ഹ എന്നേ വിശ്വസിക്കെന്നു....) അപ്പോള്‍ അവള്‍ എന്‍റെ അടുത്ത്‌ വന്നിട്ട് എന്നോട് വഴക്കുണ്ടാക്കണം . രണ്ടു പെഗ്ഗ് എന്ന് കണക്കു വെച്ചു എനിക്കൊഴിച്ചു തരണം . പിന്നെ , പിന്നെ ...... ഈ ഇംഗ്ലണ്ടിലെ തണുപ്പില്‍, കമ്പിളിക്കുള്ളില്‍ എന്നേ കെട്ടിപിടിച്ചു കിടക്കണം . എന്‍റെ നെഞ്ചില്‍ തല വെച്ചു എന്നേ മുറുക്കെ കെട്ടി പിടിച്ചു കിടക്കണം . ഇനിയും എഴുതണം എന്നുണ്ട് ബൂലൊകത്തെ സെന്‍സര്‍ ബോര്‍ഡ്‌ കാരെ പേടിക്കുന്നു . സ്ത്രീ ബ്ലോഗ്ഗര്‍ മാരെ ബഹുമാനിക്കുകയും ചെയ്യുന്നു . കൂടാതെ ഞാന്‍ ഈ എഴുതുന്നത്‌ എന്‍റെ ഭാവി ഭാര്യയെ കുറിച്ചാണ് . ഈ കോട്ടയം കാരന്‍ അരങ്ങത്തു നടുത്തൊട്ടി തോമസ്‌ ജെയിംസിന്റെ ഭാവി പട്ടമഹിഷിയെ കുറിച്ചാണ് . ഞങ്ങളുടെ ജീവിതം ഞങ്ങള്‍ മാത്രം അറിഞ്ഞാല്‍ മതി . 


പിന്നെ വര്‍ഷത്തില്‍ ഒരിക്കല്‍ നാട്ടില്‍ പോകും . എന്‍റെ പെണ്ണ് ഒരു ഗ്ലാസ്‌ ചായ ഉണ്ടാക്കി എന്‍റെ അപ്പന് കൊടുക്കണം . പ്രായമായ എന്‍റെ അമ്മയുടെ അടുത്ത്‌ പോയിരുന്നു വര്‍ത്തമാനം പറയണം . മുറ്റമടിക്കാനും പാത്രം കഴുകാനും ഒന്നും എന്‍റെ ഭാര്യ പോകണ്ട . കൈയുടെ സോഫ്റ്റ്‌ നെസ്സ്‌ പോകും . അതിനൊക്കെ എന്‍റെ ചേടത്തി മാര് പൊയ്കോളും( എന്‍റെ രണ്ടു ചേട്ടന്മാരും ഈ ബ്ലോഗ്‌ വായിക്കും , ഇതിനുള്ള മറുപടി ഫോണില്‍ വരും ഹ ഹ ഹ ). പിന്നെ പിന്നെ ... ഇനിയെന്താ ഭാവി ഭാര്യയുടെ കടമകള്‍ .???
എന്‍റെ വെല്യപ്പച്ചന്‍ കഷ്ടപ്പെട്ട് പണിയെടുത്ത ഞങ്ങളുടെ പാടം ( കണ്ടം ) അവള് പോയി കാണണം . എന്നിട്ട് ചിന്തിക്കണം , അവളുടെ കുഞ്ഞുങ്ങളുടെ അപ്പനും ( ഞാന്‍ ) സഹോദരങ്ങളും അടക്കം എല്ലാവരും പട്ടിണിയില്ലാതെ കിടന്നത് ഈ പാടം കാരണമാണെന്ന് . ആഷസ് മൈതാനം കാണുമ്പോള്‍ ഉള്ളതിനേക്കാള്‍ ഒരു ഫീല്‍ അവള്‍ക്കുണ്ടാവണം ആ പാടം കാണുമ്പോള്‍ . പിന്നെ ഞങ്ങളുടെ കന്ന് കാലിക്കൂട് ...... ഞങ്ങളൊക്കെ വയറു നിറച്ചു എരുമപ്പാല് കുടിച്ചത് ............. തൈര് കൂട്ടി ചോറുണ്ടത്. ഓരോ പ്രാവശ്യം എരുമപ്പാല് കുടിപ്പിക്കുംപോഴും വെല്യമ്മച്ചി പറയുമായിരുന്നു , നീയൊക്കെ എവിടെ പോയാലും , എന്ത് ജോലി ചെയ്താലും ക്ഷീണിക്കത്തില്ലന്നു........ ആ കന്ന് കാലിക്കൂട് കാണുമ്പോള്‍ എന്‍റെ ഭാര്യക്ക് മനസിലാവണം അതിനു ബ്രിട്ടീഷ്‌ രാജ്ഞിയുടെ ബക്കിന്‍ഹാം പാലസിനെക്കാള്‍ മഹത്വമുണ്ടെന്നു .


ഞങ്ങളുടെ കുടുംബ പള്ളിയില് പോയി മുട്ട് കുത്തി പ്രാര്‍ഥിക്കുമ്പോള്‍ , അവള്‍ പ്രാര്‍ഥിക്കണം അവളെ ദൈവം ഏല്‍പിച്ച കുടുംബത്തിന്റെ സമാധാനത്തിനായിട്ടു , ആ കുടുംബത്തിന്റെ വിജയത്തിന് . .......................


വേണ്ട ഇനിയെഴുതി വെറുതെ " ബൂലോകരുടെ" സമയം പാഴാക്കുന്നില്ല . ഒരു കാര്യം കൂടി . ഇങ്ങനെയൊക്കെ ചിന്തിച്ചു കൊണ്ട് " തപ്പി" നടന്ന ഒരു ദിവസം . .( രണ്ടു മാസം മുന്‍പ് ) . അവധി കിട്ടിയ ഒരു ഞായറാഴ്ച ഞാന്‍ ചേട്ടന്‍റെ വീട്ടില്‍ പോയി . കൊവെന്ട്രിയില്‍ . ഇവിടെ നിന്ന് ഒരു മണിക്കൂര്‍ യാത്ര . വൈകുന്നേരം ചേട്ടന്‍ പറഞ്ഞു ,എടാ മലയാളി കൂട്ടായ്മയുടെ പ്രാര്‍ഥനയുണ്ട് നീ വേണേ പോയ്കോ എന്ന് . പണ്ടേ " ഭക്തനായ " ഞാന്‍ ആവേശത്തോടെ എണീറ്റ്‌ പ്രാര്‍ഥനക്ക് പോയതില്‍ ചേട്ടന് വല്ല സംശയവും തോന്നിയോ വാ . എനിവേ , പോയ വഴിയില്‍ ഒരു പ്രാര്‍ത്ഥന മാത്രമേ ഉണ്ടായിരുന്നുള്ളൂ . കര്‍ത്താവേ ഇത്തവണയെങ്കിലും നീ എന്നേ നിരശനാക്കല്ലേ എന്ന് . ചെന്നപ്പോള്‍ , ഒരു വീട്ടില്‍ ആകെ  നാലും മൂന്നും ഏഴു പേര് . പിന്നെ തടിക്കെടെല്‍ പൂള് വെക്കുന്ന മാതിരി ഇടയ്ക്കൂടെ പത്തു പതിനഞ്ച് കുഞ്ഞുങ്ങളും . ദൈവമേ അകത്ത് കേറിയും പോയി ഇനി ഇറങ്ങാനും പറ്റുകേല . എന്തായാലും വന്നതല്ലേ എന്ന് കരുതി അവരുടെ കൂടെ കൂടി . പോരാത്തതിന് പ്രാര്‍ഥനയുടെ അവസാന ഭാഗത്തുള്ള നന്ദി പറഞ്ഞു തുടങ്ങിയിരുന്നു . ഒരു ചേട്ടന്‍ ആണ് ലീഡര്‍ . അങ്ങേരു ചവിട്ടി പിടിക്കുകയാണ് . എട്ടു മണിക്ക് തൊടങ്ങിയ നന്ദി എട്ടേ കാലു , എട്ടര , എട്ടേ മുക്കാല് , ഒന്‍പതു ....... പോവുകയാണ് നന്ദി .......... ഞാന്‍ ആണെങ്കില്‍ കൊറേ കാലം കൂടിയാണ് തറയില്‍ ഇരിക്കുന്നത് . എന്‍റെ നടു ഒരു പരുവമായി . ബാകിയുള്ളവരെല്ലാം ഓരോരോ കാര്യങ്ങള്‍ക്കായി എണീറ്റ്‌ പോയി . കൊച്ചുങ്ങളെ നോക്കാനും . പ്രാര്‍ത്ഥന കഴിഞ്ഞുള്ള കാപ്പീടെ കാര്യത്തിനും . പറഞ്ഞു വരുമ്പോള്‍ . ഫുള്‍ ടൈം ഇരുന്നത് ഞാന്‍ മാത്രമാണ് . " സുവിശേഷി" കസേരയില്‍ ഇരുന്നാണ് കീറുന്നത് . ഒന്‍പതേകാല്‍ ആയപ്പോള്‍ ആശാന്‍ അങ്ങേര്‍ക്കു കിട്ടിയ അനുഗ്രഹങ്ങള്ക് നന്ദി പറയാന്‍ തുടങ്ങി . കര്‍ത്താവേ നീ എനിക്ക് തന്ന ജോലിക്ക് ...... കാറിനു ..........( ബി എം ഡബ്ലിയു) സത്യം അങ്ങേരു പേരടക്കം പറഞ്ഞു . വീടിനു ....... മക്കള്‍ക്ക്........... അവസാനം ഒരു സെക്ഷന്‍ ഭാര്യയുടെ ഗുണഗണങ്ങള്‍ !!!!!!! അതൊരു പതിനഞ്ച് മിനിറ്റ് ........... ഭാര്യയുടെ ആ സ്വഭാവത്തിന് , ഈ പെരുമാറ്റത്തിന് , അവളന്ന് അങ്ങനെ ചെയ്തതിനു കര്‍ത്താവേ നിനക്ക് ഞാന്‍ നന്ദി പറയുന്നു . .................. സത്യം എന്‍റെ കുരു പൊട്ടിയ പ്രാര്‍ത്ഥനയായിരുന്നു അത് . ചേട്ടന്‍ ഭാര്യയെ എടുത്ത്‌ നാട്ടു കാരുടെ മുന്‍പില്‍ സ്വര്‍ഗത്തിലേക്ക് പൊക്കിയപ്പോള്‍ ഭാര്യയുടെ മുഖത്തൊരു അഞ്ചു ബാറ്ററിയുടെ ടോര്‍ച്ചിന്റെ തെളിച്ചം ഉണ്ടായിരുന്നു . എന്തായാലും ദൈവം പ്രാര്‍ത്ഥന കേട്ടാലും ഇല്ലെങ്കിലും , അന്ന് രാത്രി ചേട്ടന് ഒരു അര മണിക്കൂര്‍ "എക്സ്ട്രാ ടൈം" കിട്ടി കാണും . ഒരു ഒന്പതെ മുക്കാലോട് കൂടി ആശാന്‍ പണി നിര്‍ത്തിയപ്പോള്‍ , ഞാന്‍ വിട്ട നെടു വീര്‍പ്പുകള്‍ക്ക് ഒരു അന്ത്യ ശ്വാസത്തിന്റെ എഫക്റ്റ് ഉണ്ടായിരുന്നു .
"പണി" കഴിഞ്ഞപ്പോള്‍ സോറി പ്രാര്‍ത്ഥന കഴിഞ്ഞപ്പോള്‍ ആശ്വാസത്തിനായി നല്ല ഒന്നാംതരം ചായ ലിജോ ചേച്ചി ( പ്രാര്‍ത്ഥന നടന്ന കുടുംബത്തിലെ കുടുംബിനി ) തന്നു . പിന്നെ നാട്ടില്‍ നിന്ന് കൊണ്ട് വന്ന വട്ടയപ്പം . മുറുക്ക് ..... അന്ന് കാപ്പി കുടിച്ചു കൊണ്ടിരുന്നപ്പോള്‍ സുവിശേഷിയും അങ്ങേരുടെ ഭാര്യയും എന്നേ പരിചയപെട്ടു . ഒത്തിരി നേരം വര്‍ത്താനം പറഞ്ഞു . ഞാന്‍ പറഞ്ഞു ബര്‍മിംഗ്ഹാമിലാണ് . കല്യാണം കഴിച്ചിട്ടില്ല ..... അങ്ങനെ ഓരോന്ന് .
ഞങ്ങള്‍ സംസാരിച്ചു കൊണ്ടിരുന്നപ്പോള്‍ സുവിശേഷിയുടെ ഭാര്യ അടുക്കളയിലേക്കു പോയി . പെട്ടെന്ന് സുവിശേഷിയുടെ വക ഒരു ഡയലോഗ് , മോനെ തോമാച്ച , ഡാ കഴിവുണ്ടെങ്കില്‍ പെണ്ണ് കെട്ടിയേക്കരുത്. കെട്ടിയാല്‍ തീര്‍ന്നു ജീവിതം!!!!!!!!!! . പിന്നെ ഇവളുമാരുടെ ഒക്കെ വാലേല്‍ തൂങ്ങി മനുഷ്യന്റെ ജീവിതം തൊലഞ്ഞു പോകും . പുറത്തൂന്നു നോക്കുമ്പോള്‍ നല്ല രസമാണ് . പുള്ളി തുടര്‍ന്ന് കൊണ്ടേയിരുന്നു . ശര്‍ക്കര പാനി കണ്ട ഈച്ചയെ പോലെയാണ് കല്യാണം . ആദ്യമൊക്കെ നല്ല മധുരമാണ് . ഈച്ച പോയി ശര്‍ക്കര കുടിക്കും . പിന്നീട് മധുരം കഴിച്ചു തിരിച്ചു പറക്കാന്‍ തുടങ്ങുമ്പോഴാണ് , കാലു ശര്‍ക്കരയില്‍ ഉറച്ചു പോയ കാര്യം മനസിലാകുന്നത് . അതോടെ ജീവിതം തൊലയും . ഇത് പോലെയാണ് കല്യാണവും , പോരാത്തതിന് ഇപ്പഴത്തെ പെണ്ണുങ്ങളുടെ അഹങ്കാരവും . എന്‍റെ ഭാര്യക്ക് എന്നേക്കാള്‍ കൂടുതല്‍ സാലറി ഉണ്ട് . അവളെ ഒന്ന് മെരുക്കി നിര്‍ത്താന്‍ പെടുന്ന പാട് എനിക്ക് മാത്രേ അറിയത്തോള്ള്. തമാശ പറഞ്ഞു തിരിഞ്ഞു നോക്കിയ ചേട്ടന്‍ കണ്ടത് ഇത് കേട്ട് കൊണ്ട് നില്‍ക്കുന്ന അങ്ങേരുടെ ഭാര്യയെയാണ് . 
അപ്പോള്‍ മിസ്സിസ് സുവിശേഷിയുടെ മുഖം , വെള്ളിടി വെട്ടി അടിച്ചു പോയ ബള്‍ബ്‌ പോലെയായിരുന്നു . ചേച്ചീടെ മുഖം കണ്ടിട്ട് ചേട്ടനന്നു " എക്സ്ട്രാ ടൈം" പോയിട്ട് റെഗുലര്‍ ടൈം പോലും കിട്ടികാണത്തില്ല .
.